मंसिर १२, मुगु ।
मुगु जिल्लाको एक गाउँमा कांग्रेस पक्षले अन्न पिस्न नदिएपछि कम्युनिस्ट पक्षले छुट्टै घट्ट बनाएका छन् । फरक राजनीतिक आस्था भएकै कारण घट्टमा अन्न पिस्न पनि विभेद गरिएको हो ।
राजनीतिक दल र विचार नमिलेपछि छायाँनाथ रारा नगरपालिका–६, स्थित लिउडी गाउँमा कांग्रेस र कम्युनिस्टले अलग-अलग पानीघट्ट निर्माण गरेका छन्। भने गाउँमा बहुमत र अल्पमतको आधारमा भौतिक पूर्वाधार बनाउन थालिएको छ ।
२७ घरधुरी रहेको सो गाउँमा कांग्रेसको बहुमत छ। त्यहाँ कांग्रेस समर्थक १९ घरधुरी छन् भने कम्युनिस्ट समर्थक ८ घरधुरी मात्रै छन्। गाउँमा रहेको पुरानो पानी घट्ट आफूहरूको रहेको भन्दै कांग्रेस पक्षधरले कम्यूनिष्ट पक्षधरलाई घट्ट पिस्न दिएका छैनन् । कांग्रेस पक्षले घट्टमा अन्न पिस्न नदिएपछि छुट्टै घट्ट निर्माण गर्न बाध्य भएको कम्युनिस्ट पक्षधरको भनाइ छ ।
केन्द्र, प्रदेश र अधिकांश स्थानीय तहमा नेकपाको बहुमत भएपनि लिउडी गाउँमा भने कांग्रेसको बहुमत छ । कांग्रेस पक्षधरको बहुमत भएपछि आफूलाई फरक व्यवहार हुने गरेको नेकपा पक्षधर बताउँछन्।
गाउँको पुरानो घट्ट कांग्रेसले आफूहरूको भएको भन्दै अन्न पिस्न नदिएपछि डेढ घण्टा हिँडेर नेकपा पक्ष कोटिल्ला गाउँको घट्ट पुग्न बाध्य थिए । हाल कम्यूनिष्ट पक्षले घट्ट बनाएपछि उक्त बाध्यता अन्त्य भएको नेकपा समर्थक रामकुसम सेजुवालले बताइन्। उनका अनुसार कम्युनिस्टले बनाएको घट्टमा कांग्रेसलाई पनि पिस्न नदिने रणनीति छ ।
कांग्रेस पक्षधर प्रेम सेजुवालले कम्युनिस्टहरूले हरेक काममा विरोध मात्र गर्न थालेपछि बाध्य भएर अलग-अलग घट्ट बनाउनु परेको बताए । यता वडाध्यक्ष हर्कबहादुर ऐडीले कांग्रेस र नेकपा समर्थकले आ-आफ्नै घट्ट निर्माण गरेको बारे आफूलाई जानकारी नभएको बताए। #nepaliraibar.com
