सुर्खेत ।
सुर्खेत जिल्लामा वैशाख १४ गतेदेखि लागु गरिएको निषेधाज्ञा केहि खुकुलो बनाइएको छ । निषेधाज्ञा खुकुलो बनाएपछी जनजीवन सहज बन्दै गएको हो । तर, निषेधाज्ञा हटाइएको नभै केही खुकुलो बनाउँदै थप ८ दिन अर्थात असार २५ गतेसम्म थप गरिएको छ । जिल्ला कोभिड व्यवस्थापन समितिले थप ८ दिन निषेधाज्ञा थप गरेको हो ।
जिल्ला प्रशासन कार्यालय सुर्खेतका अनुसार गएराति १२ बजेदेखि असार २५ गते राति १२ बजे सम्मका निषेधाज्ञा थप गरिएको हो । तर, पछिल्लो समय निषेधाज्ञालाई खुकुलो बनाउँदै लगिएको छ ।
संक्रमणको जालो तोड्न, जोखिम नियन्त्रण, रोकथाम गर्नको लागि निषेधाज्ञा थप गरिएको सुर्खेतका प्रमुख जिल्ला अधिकारी छविलाल रिजालले जानकारी दिए ।
असार १ गतेबाट निषेधाज्ञा खुकुलो पार्दै गएकोमा आजदेखि बिहान ९ बजेदेखि साँझ ६ बजेसम्म पसल सञ्चालन गर्न दिइने भएको छ ।
तरकारी फलफूल पसलहरु बिहान ६ देखि बेलुका ६ बजेसम्म खुला रहने छन् ।
यस्तै, होटल तथा रेष्टुरेन्टहरु आफ्नो क्षमताको ५० प्रतिशत नबढ्ने गरी स्वास्थ्य मापदण्डको पूर्ण पालना गर्ने, भिडभाड नहुने गरी सञ्चालन गर्न पाइने छ ।
सवारी साधनमा जोर–विजोर
यस्तै आजदेखि सवारी साधनमा जोर–विजोर प्रणाली अनुसार सञ्चालन भएका छन् । सुर्खेत जिल्लाभित्र मात्र सञ्चालन हुनेगरी निजी तथा सार्वजनिक सवारी साधनहरुमा यो प्रणाली लागू गरिएको प्रशासनले जनाएको छ ।
तर, ती सवारी साधनलाई सुर्खेत जिल्ला भन्दा बाहिर जान प्रतिबन्ध लगाइएको छ ।
