गोबिन्ददेव भारती / २९ पौष सुर्खेत,
नेपाल गोजु रियो कराँते दो संघ सुर्खेतले बंगलादेशको ढाकामा आयोजित अन्तराष्ट्रिय कराँते प्रतियोगितामा बिजयी खेलाडीहरुलाई सम्मान गरेको छ ।
गत डिसेम्बर २७ देखि २९ सम्म बंगलादेशको ढाकामा भएको सो प्रतियोगितामा जीत हासिल गर्ने खेलाडीहरु प्रकाश खड्का (सुर्खेत), सन्दीप महत (सुर्खेत) र हिक्मत रोका मगर (दैलेख) लाई बिहिवार एक कार्यक्रमको आयोजना गरि सम्मान गरिएको हो ।
जसमध्ये प्रकाश खड्काले एकल कातामा स्वर्ण पदक र ७५ केजी कुमितेमा काश्य पदक, सन्दीप महतले ७० केजी कुमितेमा काश्य पदक र हिक्मत रोका मगरले ६५ केजी कुमितेमा स्वर्ण पदक प्राप्त गरेका थिए ।
जिल्ला खेलकुद बिकास समिति सुर्खेतका अध्यक्ष चन्द्रकुमार गिरीको प्रमुख आतिथ्यतामा भएको उक्त सम्मान कार्यक्रमको अध्यक्षता नेपाल गोजु रियो कराँते दो संघ सुर्खेतका अध्यक्ष लोकेन्द्रराज शाहीले र संचालन संघका सुर्खेत जिल्ला सचिव एवं खेलाडी जगतप्रसाद रिजालले गरेका थिए ।
