असोज २९, विराटनगर ।
विभिन्न अस्पतालमा उपचाररत र होम आइसोलेसनमा गरी पछिल्लो २४ घण्टाभित्र प्रदेश १ मा कोरोना भाइरस संक्रमित नौ जनाको मृत्यु भएको छ । प्रदेशभित्र एकै दिनमा कोरोनाका कारण मृत्यु भएको यो संख्या अहिलेसम्मकै धेरै हो ।
धरानको बीपी कोइराला स्वास्थ्य विज्ञान प्रतिष्ठानमा उपचाररत पाँचजना, विराटनगरको कोशी अस्पताल कोभिड–१९ उपचार केन्द्रमा दुईजना, विराट नर्सिङ होम एवं विराटनगर अस्पतालमा एक र धरानमा होम आइसोलेसनमा एकजनाको ज्यान गएको सामाजिक विकास मन्त्रालयले जनाएको छ । मन्त्रालयले प्रदेशभित्र दैनिक मृत्यु हुने र नयाँ थपिएका संक्रमितको संख्या प्रत्येक दिन चार बजे सार्वजनिक गर्ने गरेको छ ।
