कर्णाली प्रदेशमा रहेको कर्णाली प्रदेश प्रहरी अस्पताल, सुर्खेतले दुर्गम बस्ती हुम्लामा स्वास्थ्य सेवा पु¥याउने उद्देश्यसहित विशेषज्ञ सेवा दिएको छ । प्रहरी अस्पतालले ‘समुदाय प्रहरी साझेदारी’ कार्यक्रम अन्तर्गत हुम्लामा निःशुल्क विशेषज्ञ स्वास्थ्य शिविर आयोजना गरेको हो ।
अस्पताल प्रमुख तथा हाडजोर्नी एवं नसारोग विशेषज्ञ प्राविधिक प्रहरी नायव उपरीक्षक डा. श्यामकृष्ण लौडारीको नेतृत्वमा खटिएको ७ सदस्यीय प्रहरी स्वास्थ्यकर्मी टोलीले दुर्गम क्षेत्रमा पुगेर स्थानीय नागरिकलाई स्वास्थ्य सेवा दिएको हो ।
हुम्लाको नाम्खा गाउँपालिका–६ अन्तर्गत लिमी उपत्यकाको हल्जी र जाङ गाउँमा आयोजित शिविरमा ५१ महिला र १६ पुरुष गरी कुल ६७ जनाको निःशुल्क स्वास्थ्य परीक्षण तथा औषधि वितरण गरिएको थियो । त्यसै गरी हुम्लाको चंखेली गाउँपालिका–४ स्थित पिप्लाङ स्वास्थ्य चौकीमा सञ्चालन गरिएको शिविरमा १ सय ५७ महिला, ५६ पुरुष र ३४ बालबालिका गरी कुल २ सय ४७ जनाले स्वास्थ्य सेवा प्राप्त गरेका छन् । शिविरका क्रममा २७ जना सर्वसाधारणको सामान्य शल्यक्रिया सेवा समेत प्रदान गरिएको थियो । कार्यक्रममा जिल्ला स्वास्थ्य कार्यालयको सहकार्य तथा विशेषज्ञ चिकित्सक डा. उमाकान्त तिवारीसहित स्वास्थ्यकर्मीहरूको सक्रिय सहभागिता रहेको थियो ।
यसअघि प्रहरी अस्पतालका डाक्टरहरुसहितको टिमले जुम्लाको कनकासुन्दरी गाउँपालिका–८ स्थित पाण्डवगुफा स्वास्थ्य चौकीमा शिविरमा गरी १ सय ३३ महिला र ७६ पुरुष गरी २ सय ९ जनालाई निःशुल्क स्वास्थ्य परीक्षण र औषधि वितरण गरिएको थियो । प्रहरी अस्पतालले सञ्चालन गरेको ‘प्रहरी युनिटसँग प्रहरी अस्पताल’ कार्यक्रम अन्तर्गत हालसम्म कर्णाली प्रदेशका दैलेख र जाजरकोट बाहेक अन्य ८ जिल्लामा सेवा विस्तार भइसकेको छ । बाँकी जिल्लामा पनि यही महिनाभित्र कार्यक्रम सम्पन्न गरिने अस्पतालका सूचना अधिकारी प्रहरी निरीक्षक डा. सन्जीव खड्काले जानकारी दिए ।